I guis de Val di Resie a dopravin ancje un sisteme, li che par puartâ ator lis machinis di guâ si lis sburtave. In chest câs si pues viodi che lis machinis e dute la struture a jerin un pôc plui grandis, in bande si montavin dôs ruedis di len di plui o mancul un metri e dôs stangjis di len che a coventavin par jevâ e movi l’imprest. Tor dal telâr des ruedis a jerin i cerclis di fier che a fasevin che il len no si fruiàs.

 In dutis dôs lis versions di chescj furniments il plan disore, che al scomençave sot de muele, al jere inclinât in indenant par fâ cori la aghe che le bagnave. Ancje chestis machinis, che a vignivin motis cul stes sisteme a manuele di chês puartadis te schene, a vevin un plan di lavôr fat di une bree largje come la machine e che e deve infûr sul denant. Ta cheste bree si poiave ancje un piçul incuin, che al coventave par ribati il pivot des fuarpiis, al jere intaiât un vueit la che e jentrave la part de muele che e vignive infûr e ur deve un ripoi aes mans dal gue. Chel dal gue al jere il lavôr plui praticât tra i oms e i fantats che, za cun10 – 12 agns, a emigravin daûr di lôr pari, a domandâ lis robis di guâ cjase par cjase. Ogni gue al deve dongje un sô zîr e i siei clients lu spietavin dutis lis voltis che al passave. 

Par dî une, cuant che a cjapavin sù lis fuarpiis par uçâlis dopo, dutis intune volte, lis impiravin tun anel, di fier, cul ordin just des cjasis. Intal anel, il gue al tignive simpri une fuarpie che i coventave di segnâl par meti par ordin dutis chês altris. Al jere impuartant no falâ par no tornâ lis fuarpiis sbaliadis di une cjase o di chê altre. Par no sconfondisi cu lis fuarpiis al scomençave a guâ chês cjapadis par ultimis e dopo, man a man, dutis chês altris. Dopo vê guât e uçât la lame dai curtìs cu la côt (piere doprade par uçâ), e chei altris fiers, al tacave a tornâju domandant i bêçs che al veve di vê pal servizi.