Intal prin dopovuere, la Austrie e reste la mete preferide .
Tantis fameis di Oseac (tant che, par esempli, lis fameis Siega, Zuzzi, Di Lenardo, …) a gjestivin buteghis di pomis. La Americhe Latine, la Argjentine in particolâr, e riclame pal plui int di Sant Zorç e Gnive dal 1920 al 1940 plui o mancul, intant che chei di Stolvize, massime i guis, a van indevant a vê miôr la Istrie, la Cravuazie, il Cuarnâr e la Serbie. Un câs par so cont al è chel dai emigrants in Alzerie. Il secont conflit mondiâl al disfe la economie europeane e al nete vie il vecjo sisteme di comunicazion e mobilitât te regjon de alpine e adriatiche. Cu la imposizion de tindine di fier, dut al cambie. Tancj guis roseans dilunc e dopo de seconde vuere mondiâl, in particolâr chei che si jerin fissâts intai teritoris che dopo a son deventâts jugoslâfs, a molin lis lôr ativitâts e a tornin a Resie. La atenzion dai emigrâts roseans, dai guis in particolâr, cumò, e larà bande Ocident. La emigrazion, in cheste dade di timp, e scomence a interessâ no dome che i guis ma ancje altris lavoradôrs roseans, in particolâr muredôrs, che a partissin pe Gjermanie, pal Lussemburc, pe Belgjiche. Ancje lis gruessis citâts talianis a clamin massis di operaris e lavoradôrs, tra chescj ancje tancj roseans. Dopo la seconde vuere mondiâl, ancje i guis roseans a àn cambiât rote e si son indreçâts in masse bande il Friûl e il Nord di Italie. La situazion economiche grave di dopo de vuere e à tocjât dutis lis fassis de popolazion e, dal sigûr, no à sparagnât i guis. Alore a àn scomençât a bati buine part des regjons talianis, movintsi di paîs in paîs par fâ il lôr mistîr.

In chescj agns il gue ambulant, in cambi dal lavôr, al podeve cjapâ alc di mangjâ, un puest di durmî e pôcs bêçs.
Une figure aromai lontane di chê dal imprenditôr, cun laboratori e buteghe di proprietât, che e veve caraterizât la fin dal Votcent. Cu la riprese economiche che e je vignude a planc a planc dopo de vuere, ancje i guis a àn vût mût di rafâsi. Cussì i guis ambulants si son fermâts a stâ in variis citâts talianis (Mestre, Milan, Bologne, Ravenna, Florence, Terni, …) La emigrazion aromai e je definitive.