Intai secui passâts la economie in Val di Resie si basave su la pocje tiere lavorade ator dai borcs, e sui grancj boscs e prâts, che lis fameis a tignivin tant che ben comun. Lis bestiis e la vendite di formadi, scuete e spongje a jerin lis ativitâts principâls, altris jentradis a vignivin di altris lavôrs tant che, par esempli, la tiessidure. Leât a strent ae produzion di tiessûts al jere il cumierç dai kramarji, i cramârs, vendidôrs ambulants che, in cualchi stagjon dal an, a emigravin. E jere une sorte di emigrazion documentade za intal secul XIV e che si faseve, intes etis plui resintis, in dôs dadis di timp: de fin di Zenâr ai prins di Jugn, cuant che si tornave par viodi dai cjamps e des bestiis, par partî di gnûf dopo Madone di Avost, tornant ai prins di Dicembar.

Si che duncje ancje a Resie cemût che al jere par dute la mont furlane, chê dal cramâr/kramar e jere une ativitât cetant impuartante, che e je restade fin tai prins agns dal secul XX. Lis destinazions plui batudis a jerin, pal solit, lis regjons là che si fevelavin ancje lenghis slavis tant che, par esempli, la Austrie, la Boemie e la Moravie dulà che si vendevin e compravin ancje articui di feramente, e tra chei curtìs e fuarpiis.

Cemût che al è ben documentât, i kramarji a rivavin a un bon nivel di istruzion e a jerin in stât di lei e di scrivi in diviersis lenghis. Un tant al à permetût a cualchidun di lôr, cu lis jentradis dal cumierç, di rivâ a une prosperitât economiche impuartante, mandant indevant lis fameis, tirant sù lis cjasis, dant donazions par fâ e tornâ a fâ tantis glesiis e fasint rivâ tancj bêçs tai borcs dal cjanâl, in mût particolâr intal secul XVIII. Un pôc a la volte cheste emigrazion stagjonâl e je deventade temporanie e dopo definitive par tancj emigrants, che no tornavin plui e che a son lâts a stâ fis, dal imprin in cualchi paîs de Europe centrâl e plui tart, dopo dai mudaments gjeopolitics dal secul XX, ancje in Italie.
Di cramârs i roseans a son deventâts buteghîrs, vierzint buteghis in diviersis citâts europeanis ma indebilint, cussì, la struture economiche dal cjanâl che si basave pal plui su lis rimessis. Za de fin dal secul XVIII e leve madressint, e si jere inlidrisade in dute la mont furlane, une specializazion sostanziâl intai mistîrs dai emigrants, diferents di une vile in chê altre. Pardut a Resie ma soredut a Stolvize e cemût che al sucedè ancje a Liussûl, Paulâr e Trep di Cjargne, al à cjapât pît il mistîr dal gue/brüsar.