E je stade ricostruide chi une cjamare tradizionâl dulà che a son in mostre mobii e ogjets che, pe plui part, a son dai ultins agns dal secul XIX o dai prins dal secul XX. Dute la stanzie, ancje il sofit, e je piturade e decorade cun motîfs gjeometrics e a rosis. Tal mieç dal sofit si impâr la imagjin di une Madone cun Jesù Bambin. Jentrant, a man drete, si viôt un trepîts che al ten sù un pitêr / bokal di Prât / Ravanca, un cjadin / sklëda e une bocalete di Stolvize / Solbica. Po dopo inte casse di nuvice piturade a son tocs di aventari di lin che a vegnin di Gnive /Njiwa. In bande dal jet une scune, simpri piturade in maniere austere, e ven di Stolvize / Solbica. Il jet nuviçâl cul stramaç, jemplât di scartòs di blave, al è cuviert di bleons di lin e e uncuvierte in lane, dute robe che e ven di Stolvize / Solbica. Su la basse dal barcon, di len, e je une machine di cusî a manuele di Ucee / Učja. Di cuintri al jet, un picjadôr, di Stolvize / Solbica. Tai mûrs a son picjâts un cuadrut  di ricuart che al ven dal santuari de Mont Sante / Sveta Gora dongje di Gurize, un cuadri cun stampe che e figure la Crucifission, che al ven di Hostje e dôs pilis di porcelane di Stolvize / Solbica. Suntun bredul di Curitis / Korito, a son: un librut di preieris e leturis sacris, un pâr di ocjâi, une corone dal rosari e fotografiis antighis che a ricuardin la vite intai secui passâts in Val di Resie. Parsore dal trepîts, traviers dal spieli, si pues scoltâ preieris e cjantis par rosean.