Tantis krösme dai guis a conservin, dentri de portelute, santins e imagjinutis devozionâls che a testemonein la fede profonde che chescj oms a vevin tal Signôr, te Beade Vergjine e tai Sants. Chest credo ju acompagnave ancje dilunc dai lôr viaçs che a vevin simpri tancj incierts e tancj pericui, tant che i assalts dai sassins di strade. Dai libris canonics de Plêf di Sante Marie Assunte a Resie si viôt che dilunc di chescj viaçs i guis a podevin murî pal plui pal brut timp, magari tai pas des monts e tai vâts dai flums. Dai lûcs li che a murivin, cun buine aprossimazion, o podìn capî ancje i moviments migratoris. I guis, cussì, dilunc dai lôr moviments e i lôr trafics a levin dispès incuintri di pericui di ogni sorte. In segn di agrât, cuant che a tornavin, un pôcs di lôr a donavin ae glesie dal paîs furniments e ogjets di art sacre che lis dodis glesiis de Val Resie a conservin ancjemò.

A son pal plui di donazions spontaniis, o ancje domandadis dai predis, di arzentarie (relicuiaris, bocins, cjandelîrs, cjaliçs, ostensoris e crôs), paraments liturgjics, statuis e pituris.
Chescj ogjets, che ancjemò vuê a fasin part dai furniments des glesiis, a testemonein la gjenerositât di chescj oms e no par câs il grup plui grues di chestis oparis al è di une dade di timp che e va de fin dal secul XVIII ae metât dal secul XX cuant che e je stade di mode cheste pratiche produtive tradizionâl e coletive. La divierse cualitât e il valôr des oparis al jere il spieli des diferentis disponibilitâts economichis dai donadôrs che dispès a fasevin incidi, su chestis, lis lôr iniziâls. Cuant che lis iniziâls no son si pues pensâ che al fos un acuist realizât in graciis di une colete fra guis. La presince di iscrizions, su chescj manufats, e identifiche dispès lis personis che ju àn donâts e a puedin furnî elements preziôs sù di lôr e su dulà che a levin dilunc dai lôr moviments. Lis testemoneancis materiâls che lis glesiis a conservin, di là di dânus informazions su la devozion personâl dai guis e dal lôr timp, a judin a capî i lôr guscj e il lôr nivel culturâl.