Lis machinis plui antighis dai guis de Val Resie, clamadis krösme, cemût che a son rivadis fin a nô, si somein, inte lôr struture base, cu lis krame o krašnje (la crame o crassigne, casse cun scanseluts e cenglis, li che si puartave lis marcjanziis come tun russac) dopradis dai kromarji ma modificadis daûr di ce che al coventave par uçâ, cun mecanisims che a movevin piçulis muelis. Chescj furniments, che a podevin jessi puartâts ancje a spale, a jerin fats ducj di len cun pôcs tocs di metal. La mecaniche e jere tant semplice. Di fier a jerin i doi pivots: un pe muele e pe cidule di trasmission e chel altri pe cidule di moviment. Il pedâl al mandave la fuarce ae cidule di moviment che po le passave, cuntune cengle, ae cidule do trasmission e duncje, par consecuence, ae muele .

Lis krösme a spale, in medie, a vevin chestis misuris: 80 cm di lungjece, 25 cm di largjece e 100 cm di altece e un pês di plui o mancul 15 Kg, vueidis. De bande contrarie de cidule di moviment e jere inclaudade une bachete verticâl di len: insom di chê si fissave un contignidôr che al lassave colâ la aghe su la muele par bagnâle e intal stes timp par disfredâ la lame che si uçave. Dentri, sigurâts di une portele, il gue al podeve sierâ lis sôs robis e i siei imprescj.

Tancj guis roseans, cemût che al è ben documentât ancje dal tierç censiment dal Ream di Italie dal 1881, in plui di uçâ, par esempli, curtìs, fuarpiis e rasadôrs  a fasevin ancje altris lavôrs. A levin di cjase in cjase tant che artesans par stagnâ e justâ citis di ram, par comedâ ombrenis, pignatis e veris. Il stagnin – bandâr al doprave pal plui stagn par cuvierzi cuntun strât lizêr la superficie dai recipients di ram. Chest procediment al servive par che no cjapassin rusin, che al pues intacâ chescj metai cuant che a vegnin a contat cul aiar. La procedure e veve di jessi ripetude ogni volte che la fuee di stagn e scomençave a sutiliâsi e il metal a ossidâsi. Al ombrenâr  si devin di comedâ lis ombrenis rotis: al cambiave lis bachetis e chei altris tocs di metal e al cusive la tele. Ancje lis citis, che une volte a jerin fatis di crep e che par cuei si metevin pal plui in bande dal fûc vîf, al jere facil che a podessin ticâsi e po dopo rompisi. Par che no si ves di butâlis il leepignatis lis deve dongje cuntune rêt di filistrin ben strente. Ancje i plats e lis terinis a vignivin sistemâts, se a vevin cualchi fressure, cul fîl di fier. Une altre ativitât fate dai roseans e jere chê dal vedreâr ambulant, al ven a stâi che a jerin chei che a cambiavin i veris rots dai barcons. Il vedreâr ambulant, cun daûr lastris di veri di ogni misure, al leve ator pai paîs cirint barcons di fâ o di justâ.