Inte seconde metât dal secul XIX inte cort e je stade fate une piçule costruzion che, in origjin, e coventave par meti i lens; inte cjase principâl invezit a son stadis fatis pituris murariis, dôs di chês si puedin viodi ancjemò.

Dongje de jentrade de cusine viere al è stât piturât un purcitut legri sentât suntun cussin che al rapresente la bondance intant che tal mûr difûr / timplin e je stade piturade une trilogjie che e figure: ad alt la Madone de cjadree; tal mieç il cjaliç, la ostie, il voli di Diu – protetôr de umanitât (o divine providence) e doi cûrs, chi impirâts di une frece, (che intai nestris cjanâi a son un dai simbui dal cumierç); disot al è Jesù Crist in crôs. La reson des figuris che si viodin in cheste opare, massime il cjaliç cu la ostie, e varès di jessi, par ce che si pues pensâ, chê di memoreâ pre Odorico Buttolo Ploc (1768 – 1845), plevan di Resie dal 1815 al 1845 che al à vivût i prins agns de sô vite propit in cheste cjase.

Tal principi dal secul XX inte piçule costruzion che e faseve di legnarie a son stâts fats doi ambients, un disore e un disot. Chel disore al è stât doprât dal sigûr tant che cjamare, cun mûrs e sofit stabilîts e decorâts. Chel disot si pense che, almancul par un pôc di timp, lu doprassin tant che magazen pal lat / ćanibica, che po si puartave inte latarie, almancul dal 1901 e fin al 1925, sot de sagristie de glesie. Si usave a meti il lat in recipients di pueste, che ur disevin mult, che a tignivin uns 5 litris dal un. E jere cheste la misure antighe dal lat e cun chê si podeve paiâ, za dilunc de alte Ete di mieç, il census, ven a stâi i tribûts che ogni contadin di chê volte al veve di dâ ae badie di Mueç. I segns tal mûr in bande de puarte de cusine si riferissin a altris misuris plui piçulis, che cun chês si contave il lat puartât di plui fameis. A ogni X a corispuindevin dîs cops di lat. Ogni cop / kop, al jere di plui o mancul mieç litri di lat. Par contrassegnâ cheste ultime misure si doprave il segn I.