La cjase Buttolo Ploc

I prins documents che a testemonein i nons dai paîs de Val di Resie a son dal secul XIII. Chel plui antîc (l’urbari dal 1240) al descrîf par ogni localitât dal cjanâl il numar di mâs che a jerin in chê volte. Par Stolvize / Solbica a ‘nd è segnâts trê. Chescj mâs a jerin tignûts dal contadin e de sô famee che e podeve jessi componude di tantis personis. Il mâs al jere il nusel de struture economiche rurâl di fate feudâl. Di chescj cjasâi isolâts, dilunc dai secui, si à disvilupât un tiessût urban articolât che, par ce che al tocje Stolvize, al à la sô origjin tal borc che par rosean i disin Ves, che al vûl dî propit “paîs”.
Un toc dal borc al è stât subissât di une grande montane che intal 1746 e à mangjât vie la rive e e à fat vignî jù un slac di tiere. In plui des cjasis, la montane e à sdrumât ancje la glesie viere dal borc, tirade sù intal 1628 e dedicade a Sant Carli Borromeo. Dopo a àn tornât a fâ sù la glesie intun sît plui sigûr, e tor di chê al è vignût sù un borc gnûf, cul non di Les, de base toponomastiche slovene Laz, che al tacave a slargjâsi in chê ete. La glesie e lis cjasis gnovis a poiavin lis fondis sul cret. Ai 21 di Lui dal 1755 il borc al è stât fiscât ad implen di un fûc. Al è stât in chê volte, vâl a dî dopo di chestis dôs calamitâts, che, pe plui part, lis costruzions gnovis dal paîs a son stadis fatis intai borcs di Kikej e di Les. Cjase Buttolo Ploc e je nassude propit in cheste suaze storiche, e in consecuence di chei fats.