In principi i oms roseans si movevin tant, ma no bandonavin par simpri il lôr paîs: a podevin jentrâ in contat cun gnovis realtâts cence rinunziâ a tornâ pes fiestis o in ocasions particolârs.
Su la fin dal secul XIX, si regjistre la tindince progressive a vê plui une emigrazion temporanie che no une emigrazion stagjonâl. Chest al sucedeve dal sigûr pe gnove cundizion di tancj guis che a vevin un puest fis par durmî e che a vevin metude sù une buteghe e a formavin societâts intai lûcs di emigrazion.   

Lis feminis, invezit, pal plui a restavin a Resie e a scugnivin viodi di fâ lavôrs di cjase, tirâ sù i fîs e sfadiâ daûr de tiere e des bestiis.

Lis destinazions principâls di chescj moviments a jerin lis citâts plui impuartantis dal Imperi, grancj marcjâts tant che Graz, Sopron, Praghe, Budapest, …. che a ufrivin tantis buinis pussibilitâts economichis e, par chei plui intraprendents, a devin la pussibilitât di meti sù veris impresis cetant prosparis. Cierts emigrants roseans a son rivâts, in graciis des lôr altis dotis imprenditoriâls, a meti sù laboratoris di sucès e, cemût che si dîs, a son rivâts a “fâ fortune”.
E je di chê dade di timp la storie de famee Pusca, origjinarie di Prât di Resie, che e je lade a cirî lavôr tal cûr dal Imperi austroongjarês rivant te citadute di Sopron, in chê che vuê e je la Ongjarie nordocidentâl, par todesc Ödenburg, citât a dome 70 chilometris di Viene, là che a levin tantis fameis roseanis. Marcjât ben siôr, al riclamave artesans e marcjadants di ogni bande dal Imperi.

Il primarûl di cheste famee di guis e è stât Antonio Pusca nassût a Resie ai 13 di Març dal 1845, la sô femine Anna Bobaz, origjinarie di Liscjace/Juščaca e nassè ai 17 di Zenâr dal 1849. Antonio Pusca e Anna Bobaz a àn vût cuatri fîs: Giuditta, Adelaide, Maria e Antonio. Antonio Pusca al emigrà a Sopron dulà che al à fat il gue. Cu la sô serietât e capacitât tal mistîr, in pôc timp al rivà a vuadagnâ tant, garantint ae sô famee une cierte stabilitât economiche ben testemoneade des tantis fotografiis fatis in studis fotografics lussuôs in Ongjarie.

 Il mistîr di gue nol è stât abandonât de sô famee, sô fie Judite e à maridât il zovin Giuseppe Trancon (1866- 1953), origjinari di Liscjace/ Juščaca.
Giuseppe ancje lui emigrât rosean a Sopron, al deventà un gue famôs, e al à fat tante fortune in chê regjon. Di lui si dîs che al fos incjariât di uçâ lis lamis di cusine de cort imperiâl austroongjarese. La famee Trancon no à vût fîs. In curt, in graciis dal lôr laboratori a àn dât dongje une grande fortune. I doi, patint a fuart pe crisi economiche tremende dal 1929, a àn scugnût tornâ a Resie. Trancon al è tornât in val cu lis valîs plenis di bêçs che no valevin plui nuie, svalutâts de inflazion disastrose che e à colpît la economie mondiâl, un pôcs di mobii, de arzentarie di taule e tantis fotografiis. Il cugnât di Giuseppe Trancon, Antonio Pusca, al partì tant che chei altris pe regjon di Sopron, imparant il mistîr dal gue. Intal prin deceni dal 1900, al è lât a stâ inte citât di Graz dulà che al à cjatât femine e lavôr intun piçul laboratori. Ben in curt al à lassât ancje la Austrie par cirî fortune di là dal ocean. Tor dal 1920 si à fermât a stâ a Pittsburgh in Pennsylvania (Stâts Unîts di Americhe) dulà che in curt al à viert la sô ativitât comerciâl. Intai Stâts Unîts, si à specializât, cemût che a àn fat plui tart altris guis ancje in Italie, tal uçâ bisturis di chirurgjie. A lavorâ pai ospedâi al à vût simpri ocupazion sigure e la sô ativitât i à rindût une vore ben.