Il 1918 al segne la fin dal Imperi di Austrie e Ongjarie. Cu la colade dal Imperi e la rivade dai stâts nazionâi e cambie a fuart la situazion gjeopolitiche di dute la Europe centrâl. Resie no reste fûr di chescj cambiaments impuartants. Za cu la anession ae Italie intal 1866, e à part tes sôs vicendis ancje se, intun prin moment, la mobilitât bande l’Imperi austriac no je ostacolade, cemût che al è documentât dai tancj passepuarts conservâts tal Archivi storic dal comun di Resie.

La tragjedie de Grande Vuere e cjape ancje la popolazion roseane obleade a scjampâ intal 1917.
Lis destinazions a son, pal plui il Centri e il Sud Italie. In chest periodi dificil di savoltaments e conflits internazionâi al cambie ancje l’implant socioeconomic di dute la regjon alpine e adriatiche. I guis roseans, pal plui indreçâts a Est bande lis regjons imperiâls de Europe centrisetentrionâl, si cjatin a cambiâ lis destinazions, sielzint cumò, invezit des citâts dal Est Europe, localitâts plui a Ocident. La emigrazion stagjonâl e/o temporanie e lassarà il puest a une emigrazion definitive che e sarà il destin di chei che prime a jerin emigrants temporanis, ma ancje des lôr fameis. Tra lis dôs vueris mondiâls un pôcs di lôr a sielzaran ancjemò di lâ a stâ intai grues centris de Europe dal Est. In chei agns i flus migratoris europeans “a àn scuviert” gnovis liniis e si drecin a altris continents: lis Americhis e la Oceanie.

Ancje i Roseans a scomencin a imbarcjâsi par chestis gnovis nazions, diviers partint dai puarts talians, altris, za emigrâts in altris paîs de Europe, partint di altris localitâts. Tancj di lôr no son tornâts plui a Resie. Il lâ al mancul dal vecjo sisteme di partencis e tornadis di e pe Val Resie al cambiarà insot la situazion demografiche, sociâl e economiche di Resie. Chest gnûf flus migratori al è stât analizât di Francesco Micelli e Javier Grossutti intune publicazion (Ti Rosajanski po sfetü/ I Rresiani nel mondo”, intal 2001 pagj. 5) dulà che, in graciis dal studi dai documents dal archivi de Anagrafe dal comun di Resie e dal Archivi dal A.I.R.E. (Anagrafe dai talians residents tal forest) si è podude evidenziâ la storie complesse de emigrazion roseane, cirint di creâ une anagrafe dai emigrants. Cheste ricercje e sotlinee i moviments migratoris tacant dal 1919 regjistrant lis destinazions di preference dai roseans intai varis moments dal Nûfcent.