“Giovanni Negro al è il gue plui vecjo di Florence. Il mistîr lu à imparât di so pari in Friûl. Di fantat insù al leve ator cun lui, pes campagnis, a uçâ curtìs e altris fiers. La sô buteghe, tal n. 15 di via dell’Angolo, e je simpri chê dal 1959. Tai mûrs, di là des scansiis par meti vie i curtìs a pene uçâts, e je une curnîs di len, cun tancj lincins, dulà che al picje lis fuarpiis di tornâ. Lis vielis dal borc si visin ancjemò di lui cuant che, prime di meti sù buteghe, al leve in ator pes stradis de citât cu la biciclete a uçâ i curtìs dai clients ocasionâi.”
Cheste piçule testemoneance, gjavade e voltade di une interviste a Giovanni Negro Taronde (1924 – 1992)   publicade tal cuotidian “La Nazione” di Florence cu la firme di Caterina Cantoni, e je un pôc il struc di tantis storiis dai guis di chei agns. E fâs capî cetant che al è stât dificil pai guis roseans vierzi buteghe intes citâts talianis.

Intal secont dopovuere, di fat, dopo tant torzeonâ pes variis regjons de penisule, tancj guis si son fermâts a stâ fis intun lûc e dopo vê fat vignî la lôr famee a àn viert laboratoris furnîts cun motôrs a eletric che a àn miorât il lavôr. Diviers di lôr a àn slargjât la ativitât cu la vendite di curtìs, fuarpiis e v.i.. Al è stât in chest mût che, di fat, a àn lassât di bande la temporaneitât dal mistîr par stabilizâ in maniere definitive la ativitât in buteghe, stant che nol coventave plui tornâ in maniere periodiche a Resie pes ativitâts rurâls e pai leams familiârs. I guis e lis lôr fameis, ma plui in gjenerâl chei che par dibisugne o sielte a àn lassât Resie, di chel moment e fin cumò, a tornin in val juste che pes feriis e par cualchi fieste.