L’ûs de biciclete, tant che gnûf mieç di traspuart al è za de fin dal secul XIX. Une vore di guis di Resie a àn tacât a doprâle, dai prins decenis dal secul XX, stant che a rivavin a comprâle ancje chei che no vevin grandis pussibilitâts economichis.

Dopo comprade, la biciclete e veve di jessi adatade pal lavôr dal gue.
In struc a jerin dôs lis robis di fâ. La prime e jere, in gjenar, meti une une seconde cane tal telâr de biciclete e su chê fissâ une poie par une ruede dintade come chê de pedaliere e a cheste si saldave une altre plui piçule. po dopo parsore la cane si fissave doi supuarts che a tignivin sù un contignidôr di metal, cun dentri un pivot cu la muele e une piçule ruede dintade. Il moviment, ae muele, i rivave dai pedâi e cu lis cjadenis di trasmission che il gue al sistemave su lis ruedis dintadis dopo di vê gjavât la cjadene che di norme e covente par lâ indevant. La stabilitât de biciclete e dal operadôr e jere sigurade, daûr, di un cavalet incancarât tal pivot de ruede, che le tirave sù di tiere. Dôs astis metalichis tacadis tal manuvri e viertis a fasevin di poie par devant.

Cu la biciclete i guis a àn tacât viaçs tant luncs rivant in tantis regjons di Italie, cualchi volte insiemi cu la lôr famee. La biciclete e jere, in plui che l’imprest di vore dal gue, il mieç di traspuart par lâ di un puest in chel altri, che al servive la persone, lis sôs robis e i siei imprescj. Dut si meteve in dôs scjatis di len parsore dai doi puartepacs, un devant e un daûr.